Gaeopad,
nagaeopad-eopad ro ing panuino
samtang nagahueat ro eangit-
imo nga eangit
nga pirmi mo ginapasyaran;
ag baeay,
ginatueogan
dahil owa ka abi
kungdi
ro daean nga maeamig
nga gin-antiguahan mo eon nga mahaeon.
Tao gani
pero ham-at nagangirit man kimo
ro mga bituon sa palibot...
Ag owa ka man gatangis.
Di ba indi eon?
Biskan owa eon ing mga ginikanan.
Dahil ginahibaygan ka man abi nanda
ag ginapil-an ing baeay
dungis ka abi,
owat paligos
nagalinimos
peste!
sa andang pamantawan.
Pero sayod mo
nga indi nanda maabot ing eangit
ag ikaw
nga gaeopad-eopad sa andang aeagyan.
1 comment:
Abu gid rang pagpasaeamat ay may sambilog pa gid gali nga Akeanon nga mayad magsueat it binaeaybay.
Sige padayuna randaya nga gina-obra mo agod mapadasig naton ro pag-ugwad ku aton nga literatura.
Magsueat ka man it luwa, ag haiku.
Kon nakasayod eagi ako nga may imo ngara nga blog nga mayad-ayad, akon kunta nga habutang sa akon nga gin-obra nga essay sa istorya ku Aklanon Literature.
Apang bukon pa't ulihi. May conference pa nga agtunan ako ag ginkumbida ako nga magbasa hanguod sa aton nga litertura.
Ag ibutang ko gid ring blog ngara ag ring ngaean sa pag-revise ko ku ratong essay.
Pwede ko mabutang ro iba mo nga binaeaybay sa Aklanon Literature Archive, agod mabasa man ku iba natong nga kasimanwa.
Magpalista ka man sa htt://my.akeanon.com, ag mag-intra ka man sa forum rito. Abu gid ring masayran hanugod sa atong kultura.
Pwede mo gali masugiran ako kon taga-siin ka , ag kon siin ka makaron.
Ma-email eon lang ugaling ako kimo.
Sa uman, ginadayaw ko gid ka sa imo ngara nga obra--maestra!
Melcichon
Post a Comment